قصيدة توسل نظم: توفيق أبرام

قصيدة التوسل نظم: توفيق أبرام

بْاسْــمْ الله الْخَالْــق لْعْظِيـــمْ الْحِيّ المْـتْعَـــــالْ
يَامْنْ لاَ يْخْفاكْ سْـرّْ وْانْتَ الْعَالــمْ بْـــــالْحَـالَـــــة

نْتَا سنْدي يَارَافْعْ السْمّـــا حِيــنْ ضْيَـــــاقْ الْحَالْ
عْلِيكْ التَّوَكُّــلْ لِيــــــكْ الأْمْـــــر يَــا ذَالْجَــــلاَلَــة

سْبّْحْ لِيكْ الطِّيرْ والشّْجْرْ وبحُـــــــورْ اُو لْجْبـــــالْ
اُولْبْشْرْوْالْجْــــــنّْ وْالصّْخْــرْوْكْـــوَاكْـبْ جُــوَّالَـــــة

نْجِّينَا منْ ضِيقْـةْ الْـقْبْـــرْ فِـــي وْقْـــتْ السُّـــؤَالْ
بِجَاهْ القُرْشِــي حْبِيبْــــنَا حَــامِــــلْ الــــــرِّسالَـة

وْمْنْ هْمْزْ الشِّيطَانْ وْالْهْــوَى وْلْمْسِيــــحْ الدّْجَّالْ
اُونْقْصَانْ الدِّيــنْ وْالضّْـلاَلْ اُوصُحْبْـــــةْ مْـــــنْ وَالاَ

يَالْغَافْلْ يْكْفَــاكْ مْاتْـــــرُومْ شْـــرَايْــــرْ لْعْمَــــــالْ
لاَ تْقْـرْبْ زْلاَّتْ لاَ تْـــــوْدّْ القُـــــومْ الجُـــــوهَــالَــة

الدّْنْيَا لْحْظَة وْفَـانِيـَـة مْهْمـَـــــا لْعْمْـــــرْ طَــــــالْ
والْوْرْدَة لُو فـَـــاحْ طِيبْهـَــــا آخِـــرْهَا مْـــذْبَـالـَــــة

الرَّاكْبْ يْنْـزْلْ وْمْـن دْعَـــــــــــا بْالْقُـــوَّة يْهْـــــزَالْ
واللِّي يْعْنَـــا بْالْمَالْ يْنْعْــــــــدْم وْالسُّـوَايْعْ بدَّالَــة

اللِّــــي دَارْ الخير يُجْــــــــــزَا مْثْلُـــــو بْالْمْتْقَـــالْ
مْنْ يْعْمْلْ بْالشّْــــرْ يْنْحْشْــــــرْ مَابِيـنْ البُوخَـــالاَ

الصْـــــلاَ وْالسَّلاَمْ عْــلَى الْهَـــادِي غَايْةْ لْكْمَــــالْ
مْدْحُو فْنْضَــامِـي حْــرِيرْ مَـا غْـــزْلاَتُـــــو غْـزَّالَــــة

صْلاَتُـــوتْشْفِـــــي قْلُوبْنَـــــا وْتْفَاجِـــــي لْهْـــوَالْ
بْعْــدْ الْبْسْمَلَــــة الْــــوَاجْبَـــة تْبْــــدَا كُلْ مْسَالَـة

الْمُصْطَفَـــــــى طِيّْــــب الْخْــلاَيْق خَاتْمْ لْرْسَـــالْ
مكْمُولْ الصُّـــورَة وضِـــيْ لْقْمْـــرْ مْنُّـــــــو يتْـــلاَلاَ

سِيدْ الْخْلْقْ الطَّــــاهْــــرْالزّْكِــي لْمْنْـــزّْهْ لْفْــعَـالْ
صْلَّى الله عْلِيــــكْ يَــا صْفِــيّْ الْبَـــارِي تَعـَـــــالَى

فْالتَّوْفِيـــقْ اسْمِي وْ يَـالْحَـافْظْ عْنِّــــي لْقْــــــوَالْ
مْنْ شُوقِي لْزْيَارْةْ الــــــرّْسُولْ دْمُـــوعِي هْطَّـالَة

قَانْـــعْ بْالْقْسْمَـــة وْكَــافْيَانِــــي لُقْمْـــةْ لْحْـــلاَلْ
وْالسُّنَّــــــة قْصْـدِي وْغَايْتِــــي وْمْتُونْ الحْمْــدَالَـة

مَانْقـــرْب خْمْـرَة وْلاَ قْمْـــــرْ مَانْقَطْـــعْ لاَصَــــــالْ
مَانْغْتْب فْالنَّـــــاسْ مَـا نجَــــــالْسْ جْمْعْ القُـــوَّالَة

يَامُول الرّْحْمَـة الْـــوَاسْعَة لاَتْخِيْــــبْ مْــنْ سَـــالْ
احْشـرْنِي فِـي جُـورةْ النّْبِــي وْالآلْ الْفُــــوضَـالَــة